Lank laas…

Sjoe, dit voel soos die ander dag toe al hierdie dinge gebeur het, en nou sien ek eers hoe lank laas die blog opdateer is…
Sal maar weer begin. Al is dit net vir die kinders ‘n dagboek van die gesin se avonture…

Was juis die afgelope naweek in Bethelehem by die CPS kongres, en die kinders het heerlik op die plaas gekuier. Benno was volstoom besig met die Red Alert video-speletjie, en Anienie het lekker gaan speel by tannie Lut se perdeliefhebbersparadys – “horses4joy”

Tot op Bethlehem

Vanoggend is ons vroeg-vroeg op.  Ek was al vanaf 05:00 wakker, en het lees-lees-pak-pak begin om die gesin wakker te frustreer.  Toe Anienie om 06:30 opstaan wou sy dadelik eers gaan swem, en daarna strand toe – “Vir die laaste groet.”  Ons het nog seewater vir Griet gaan inpak, en daarna die vrag begin afdra na die motor.

Alles pas boomskraap, en daar is net-net genoeg plek vir Skoonma se krukke wat dwarsoor alles gedrapeer word.  Die rit het begin met mistigheid (lees 60 km/h) tot by Pietermaritzburg.  Daarvandaan het ons die nuwe “adapter” getoets, en Arne en die kinders het tot digby Bethlehem na Hannah Montana gekyk.  Ek dink Arne het boudkrampe weens die beperkte ruimte, maar ons het darem Bethlehem gehaal, vanwaar ek nou skryf.  Natuurlik het Suster Lut vir ons almal pizza gereed gehad “on arrival.”  Arne dink ons besef nie wat ‘n wonderlike sussie ons het nie, maar ek dink ons weet darem.  Ook dat my vrou wonderlik is – om so op die agterste sitplek uit te hou

Ons gaan seker more of oormore terug Bloemfontein toe.  Die kinders speel rekenaar, en buite is onweer besig om op te steek.  Lyk my ons het die reen van Natal af saamgebring!  O ja, nog nie foto’s geneem nie, die kamerasak is nog onaangeraak – sal maar sien of ek die naweek ‘n paar kan neem.

Somervakansie by die see!

So loop ons vankansie van die afgelope week ook more ten einde.  Ons het Sondag by Natalia arriveer (Ouma ook in die motor, net ingeval iemand dink ons het haar versaak en verlaat )

Ek dink ons het een dag amper die son gesien, maar danksy die warm swembad het die kinders darem heelwat geswem.  Ek dink hulle en Arne het gister ‘n nuwe rekord vir lank-in-die-swembad-wees opgestel.  (Met reen wat af en toe oor hulle geval het.)

Vandag het ons “Cloudy with Meatballs” by die IMAX gaan kyk.  Benno was eers nie baie lus nie, maar het gegaan.  Skoonma het vir die tweede keer die week met een kruk aan die een kant, en ‘n menslike kruk aan die ander kant die inkopiesentrums trotseer.  Ek dink die seaview met donker wolke oor kan ook te veel (of dan te min) raak.

Ons het vanaand gou vir Violet gaan seewater haal, en Benno het nog ‘n laaste “Stunt” in die water gaan doen deur krappe met sand te gooi.  Anienie is weer bekommerd (Hipochondria) dat sy allerhande siektes onder lede het.  .

Vir die week sover het ek nog nie foto’s geneem nie, het ook bewustelik besluit om bietjie minder met die kamera te dwaal, en die kop te laat rus.  O ja, ons het ook die gesin se kersgeskenk, ‘n WII Fit en toebehore gekoop!  Sal dan net kleiner geskenkies bykoop.

In die nuus die week was hoofopskrifte oor die dood van Chris Louw (Boetman) wat aan soveel Blanke Afrikaanse mans van my generasie die stem was wat ons wou laat hoor.  Ook uiteindelik hard teen misdaad “geskryf,” en toe net nie meer kans gesien nie, en homself met ‘n AK47 geskiet.  Demmit.  Ons het sy kaliber mens so nodig in ons ou landjie wat so tussen afgrond en vaste grond huiwer.

Nou ja, gesels later…

Paar herinneringe van die jaar

Omdat ek graag hierdie blog vir die kinders wil hou as ‘n tipe rekord van ons gesin se avonture en die gebeure om ons, is ek nogal gefrustreerd dat ek nie gereeld daarby uitkom nie.  Tog, frustrasie gaan my niks help nie, en ek neem nou my dagboek en reflekteer sommer in elk geval oor van die dinge wat die afgelope jaar gebeur het.  Dalk is die maklikste vertrekpunt sommer die afgelope naweek.  Ek het Vrydag verlof gehad om op uitnoding van die Kathu kameraklub ‘n Photoshop kursus daar te gaan aanbied.
13 November: Kalaharie Naweek in Kathu.
Die kinders was al die week voor die tyd opgewonde oor die rukkie wat hulle uit die skool sou kon afslag kry, synde ons al 09:00 moes ry.  Ons het dan ook besluit om sommer by Kimberley se gat te stop vir ‘n bietjie van ‘n geskiedenis les!  Dit het nie so goed gewerk nie, synde ons die videovertoning (R180 vir die gesin) eerder van die hand gewys het.  Ons kon darem deur van die uitstalhuisies stap (en het vir R60 vir die gesin na die gat gaan kyk – uiters teleurstellend, maar nou ja, ons was darem daar…).  Benno het Ben 10 plakkers gekoop en Anienie Hannah Montana plakkers – geskiedenisles afgemerk!
Daardie aand het ons begin met die Photoshop-opleiding en die volgende oggend by die stalle gaan foto’s neem.  Die Saterdag was Arne en die kinders merendeels by die gastehuis, waar Anienie die swembad natuurlik baie geniet het!   Die middag is ons na die gholf-estate en ek dink Anienie se opsomming was die beste toe sy na die bome en veld kyk — “Nou lyk die Kalahari soos dit klink, dit lyk nou soos Kalahari.”  Saterdagaand het ons gebraai en daarna weer bietjie opleiding gedoen.  Sondagoggend het ons by die natuurreservaat langs Kathu gaan foto’s neem – en na ontbyt die lang pad huis-toe aangedurf.  Anienie het dit soveel geniet dat sy gereken het sy wil sommer voor kersfees weer Kalahari toe gaan, ten spyte van die lang pad.  Hoewel Arné en die kinders nie saam was na die natuurreservaat toe Sondagoggend nie (ons het 4:30 reeds gery), het Benno, danksy Susan, ‘n gedeelte van ‘n kameelperdgeraamte gekry om saam te bring huis-toe.  Dit in aansluiting by sy reuse klip-versameling, waar Susan ook die bydrae van ‘n koperklip gemaak het.
Ek dink Ouma Barbara was nogal bly om ons weer te sien.  Elmarie het haar die naweek ge “Ouma-sit”. Teen Sondagaand was dit ook duidelik dat Arné en Benno besig was om weer griep te ontwikkel…Toggietog.
17 November 2009:
Het vanoggend vroeg vir Tim Smith van Learningcurve op die lughawe gaan haal. Hy het met genooide onderwysers kom praat oor Adobe se K12 skoleprojek.  Johan Minnie en Johan Coetzer het ‘n aanbieding oor Customer-Centricity kom aanbied – baie interessant!  Lyk asof Liberty al meer begin besef hoe belangrik die bestuur van kliënte-inligting is.
Vanaand het ek en Prof Hennie bietjie oor Photoshop gesels, daarna het ek ‘n kort aanbieding vir die ouers by Willem Postma se Bybelstudie gedoen oor Resilience, en toe nog vinnig by Annarette hulle se kerk oor die tema van “Jy as geskenk”.  Tuisgekom was almal aan die slaap, behalwe Ouma Barbara, wat toe saam my kyk hoe die Springbokke verloor teen die Engelse klubspan, Saracens, (wat self belaai is met oud-Springbokke). Teen laatnag in die bed. Ek wonder nogal al meer oor die aard van “sport-ekonomie”.  Hoe hard speel mens as jy vir geld speel vs hoe hard speel jy as jy uit lojaliteit speel…
Die week van 26 Junie tot 4 Julie: Gesinskamp, Natalia
Soos gewoonlik was daar ‘n oorstop op Bethlehem voor die gesinskamp.  Marie en haar vriendin, Lara, het saamgegaan (van Bethlehem af het hulle saam met Elmarie gery), ons moes Elmarie se ma in Pietermaritzburg oplaai en het dit sommer kombineer met ‘n besoek aan die skoenlapper (jinne, wat sal mens dit noem — soos ‘n akwarium vir skoenlappers) – plek.  Daar het ons geëet, skoenlappers afgeneem en die res van die pad aangedurf.
Tydens die gesinskamp was die sprekers Johann Smit en Johan Maree.  Dawie hulle het ook oppad na Margate verbygekom (bloot toevallig dat ons met mekaar gepraat het) en saam met ons gaan ontbyt eet.  Hulle het ook later weer kom kuier.
Na die gesinskamp het ons aangebly aangesien daar Bestuursopleiding was wat ek vir Liberty se management academy moes doen.  Ek sou ook namens Liberty se opleidingsdepartement twee dae Praktykbou-opleiding vir ABSA gee, maar dit is gekanselleer – het toe maar sommer verlof ingesit, aangesien die besprekings reeds gemaak was.
Tydens die gesinskamp was ma op Bethlehem by Ouma Louisa.  Ek het ook ‘n goeie hou jig gekry, terwyl die griep Arné gevang het in die tweede week. Anienie se verjaardag was natuurlik in die tweede week, en ja, eers het Dawie hulle kom kuier, toe het ons saam met die Spiese gaan eet by die koffiewinkel, en die Natalia maatjies het ‘n tonnel gevorm waardeur sy kon loop.  Die partytjie het nie opgehou nie, want oppad terug het Lut ook nog in samewerking met Ouma Barbara ‘n reuse koek bestel, en Anienie se partytjie is by “Horses for Joy” verder gevoer…
Met die laaste funksie van die gesinskamp het die kinders kort voor die talentaand besluit om Romeo en Juliet op te voer. Ek en Arné het ons uit die reëlings gehou, maar Anienie het Wynand oortuig om hulle ‘n kans te gee!  En daar doen hulle toe ook sommer ‘n baie kort Romeo en Juliet, met Anienie en Benno in die hoofrolle en Amore as die “nurse”.  Ons kinders se dramaloopbane het begin (met ‘n twee minuut vignette!).  Dieselfde aand het ons ‘n midweek by Natalia gewen met die Lucky Draw.  (Ook geboek vir die einde van November en begin Desember, hoewel dit bietjie bots met die skole se sluit).

Nog aanlyn!

Mens kry nie altyd kans om te blog nie – ek dink mens wil te perfeksionisties wees, en dalk te veel sê.  Dalk moet ek vandag net gesels oor die feit dat ek dankbaar is vir my vrou, my kinders en al die wonderlike mense wat al my pad gekruis het.  En dalk is dit al baie…

Augustus hardloop…

Sowaar, sowaar – mens kan nie glo hoe die tyd verbygaan nie.  EN daar is soveel lekker dinge om te doen, soveel avonture! 

Vir eers was daar laas naweek die fotosafari met Hendrik Crafford se span in Clarens.  Daarna die motor wat ingegee het in Bethlehem – en dankie tog die ignition het toe nie R10 000 gekos soos aanvanklik beraam is nie – was dit dalk bloot geluk dat ‘n werktuigkundige op verlof my kon kom help?  Dalk meer gebede.  Dit het wel beteken dat Arne en die kinders moes terugdraai Bloem toe en weer die geleentheid plaas toe saam met die Van Leeuwens meemaak.  Ons het ‘n besonderse rustige naweek gehad, met Benno wat die spruit geniet het, en Anienie wat alleen en saam met Amore die plaaspad aangedurf het.

Maandag en Dinsdag was Oom Faan en Tannie Rie hier.  Hulle trek Kaap toe, en het die lang reis in skofte onderneem.  Hulle kon darem met ma-Barbara kuier, terwyl ons vir werk voorberei het.  Ek was gou Dinsdagaand by die kamerkaklub, om Scott Kelby se Photowalk aan te kondig. 

Woensdag was Jay hier.  Donderdag was ek op verlof die oggend om in Kroonstad vir Pannar ‘n aanbieding te doen.  Vrydagaand het ek die Cheetah Griekwa wedstryd gaan kyk om ‘n artikel vir PASSI te doen.  Gisteroggend het ek en Arne na Elsabe Aldrich gaan luister en ek het die foto’s geneem.  Tussendeur poog ek om die FUTURE aanbieding reg te kry vir Hennie Bouwer se sessie in die Drakensberge. 

Die kinders is ook bedrywig met Benno wat Dinsdae skaak speel, en allerhande buitemuurs by die skool het.

Vanoggend was ons gou kerk toe, en ja, nou is dit Sondagmiddag – wil gou bietjie gaan rus voordat ek vir Charlie gaan kyk na die vergelyking tussen Kite Runner en Life is Beautiful…

Sommer ‘n kort storie oor kindwees -

Net om darem in kontak te bly!  Ek steel gou hierdie sandsteenstorie by myself om te deel!  Dit was onlangs toe ons op die plaas gekuier het saam met die Van Leeuwens -

Krappe so groot soos koeie!

Die onverwagse vakansie was welkom.  Ons kon weer ‘n langnaweek op die plaas inruim.  Ek was opgewonde oor die geleentheid om weer foto’s te neem.  Herfsbome in die Oos Vrystaat.  Kameras was in, en die kinders was opgewonde om weer te gaan kuier.

Met die eerste verkenningstog het ek besef ek was te laat.  Die geel herfsbome was reeds winter danksy ‘n koue naweek vroeër in die maand.  Die laaste geel blare het verdwaald in ‘n laatmiddag koue tussen wintermotreën-wolke gehang – gesliert en gesloop van helderheid.  Dit was sommer yskoud.  Gelukkig kry kinders mos nie koud nie.  Toe Saterdagoggend se grys yskombers weer kom hang stap ek met die kinders rivier toe.  En die wêreld gaan oop voor die kinders.  Dis Benno wat eerste die krapknypers raaksien.  Met ywer begin hy versamel.  Die dogtertjies ook.  Water spat om hulle nat tekkies en hulle broeke is nat tot net onder die knieë.  In hulle wêreld is daar op die oomblik geen koue nie.  Net verbeelding, water wat plas, en krappe.

Benno kondig luidkeels aan dat hy ‘n krap gesien het.  Die ander storm nader.  Toe hy begin om te vertel dat die krap so groot soos ‘n bees was, besef ek dat hy besig is om met vreeslike gare ‘n reuse woordtolletjie te spin.  Maar die ander geniet dit.  Tussendeur begin ons aanstaltes maak om huis-toe te gaan.  Maar die kinders wil bly.  Vasgevang in hierdie oomblik van ewigheid.  En vir die oomblik dink ek oor wat ons in die stad sou doen.  Waarskynlik in die vervelende koue iewers na ‘n mall toe gegaan het.  Iets gekoop het om die kinders mee besig te hou.  Defnitief nie krapknypers nie.  Mens kry dit nie in speelgoedwinkels nie.  Ook nie die wind in jou hare en die reuk van rooigras nie.  Mens se kinders kan nie met nat skoene en kouse slof nie.  Jy sal vreemd aangekyk word.  En tog, hier, in hierdie oomblik weet ek dat mens nooit die werklike daarwees van die natuur kan koop nie.  Dis ‘n kersgeskenk wat elke dag wag om geneem te word.  En tog, soos mens ouer word vergeet mens soms, soms verloor mens die kleurvolheid – soos die herfsbome wat van die heldergeel gestroop word deur die gang van die seisoene.

Terwyl ons huis-toe stap voel ek die gras weer teen my bene, ek ruik die modderige reuk van die spruit en hoor die wind wat die wilgerblare laat woesj sê.  By die huis het Arné warm koffie gemaak.  Die kinders hardloop na haar met die krapknypers.  En ek voel weer soos ‘n kind toe ek met die warm, stomende koffie in my hand sit en vir Arné vertel van die krap wat ek gesien het.

“So groot soos ‘n bees…”

Die skoolvakansie staan einde se kant toe

So laaste Sondag!  En die vakansie is verby.  More is dit vroegopstaan vir almal!  As ek terugdink was dit ‘n lekker vakansie, en ek hoop die kinders en Arne sien dit ook so!   Ons het weggetrek met die gesinskamp by die see – daarna die plaas, toe Petoors se besoek, Anien se verjaardag, Gold Reef City, en uiteindelik terug tot by vandag.  Gedurende die vakansie het Anienie by Amore gaan slaap, Hendru Barnes by Benno kom slaap en, in die algemeen het Benno en Anienie ook lekker gespeel.  Veral rekenaar!

Hulle het onder andere ‘n Kimpossible dressup game op die internet ontdek.  En dit was te pragtig toe ek een aand afkom op ‘n google soektog wat Anienie gedoen het:  ”Benno+van+Niekerk+dressap+gyme”  - Wonderlik hoe lateraal daar al gedink word!  Ek loop toe ook nog hierdie foto’tjie van ‘n paar jaar gelede raak!  Die Boetie en Sussie wat so lief is vir mekaar!

Ek hoop hulle kan altyd sulke lekker maatjies bly! Ek onthou nog toe hulle saam in die kleuterskool was het juffrou Sonja vertel dat hoewel hulle ander maatjies gehad het, hulle altyd die graagste met mekaar gespeel het!  So op die einde van die vakansie is die lekkerste lekker om te weet ons kinders is nie net boetie en sussie nie, maar ook beste maatjies wat omgee vir mekaar! Pappa en mamma is trots op julle!

Saterdagaand – Almal tot rus

Dis Saterdagaand – 23:10! Het vandag gou aanbieding oor “The future” gedoen.  Nou ja, ek gaan nie veel se nie… Voel soos Benno op hierdie foto’s uit die argiewe… Op die tweede ene was hy nog besig op die rekenaar toe Klaasvakie kom.  (By Lut hulle se huis)

 

 

 

 

 

 

 

 

By Goldreef City

Nou ja, dit lyk nie of ons tot stilstand kom nie.  Saterdag was Anienie se partytjie, en vandag is ons by Gold Reef City.  Ek moet kom aanbied, en betaal sommer die verskil in by die hotel, dan kan die hele gesin hier bly…Arne het die kinders afgeneem toe ons hier aankom.  Hulle kon nie wag vir die “funky” karretjie nie!

Wel, more bied ek vir die eerste keer die Negotiations skills kursus aan.  Ek hoop maar dit sal goed gaan.  Die trip hierheen het goed verloop, met Anienie wat al meer vasberade raak om diere wat uitsterf te red!  Juis daarom kan sy ook nie wag om more die 4D fliek oor Pandavision weer te sien nie!!

En ja, Benno was lekker ongeduldig om die hele Gold Reef City weer te sien.  Min tyd vir pappa en sy kamera:

Wel, nou gou bietjie voorberei!